ఐఎల్టీ20 క్వాలిఫైయర్ 1లో ముంబై ఇండియన్స్ ఎమిరేట్స్‌పై డెజర్ట్ వైపర్స్ ఘనవిజయం సాధించి ఫైనల్ బెర్త్‌ను ఖరారు చేసుకుంది. అమెరికన్ బ్యాటర్ ఆండ్రీస్ గాస్ ఆకాశమే హద్దుగా చెలరేగి కేవలం 58 బంతుల్లో 9 సిక్సర్లు, 7 ఫోర్లతో అజేయంగా 120 పరుగులు చేశాడు. గాస్ తన టీ20 కెరీర్‌లో అత్యధిక స్కోరును నమోదు చేయడమే కాకుండా, ఈ లీగ్‌లో తన తొలి సెంచరీతో రికార్డు సృష్టించాడు. వైపర్స్ నిర్దేశించిన 234 పరుగుల భారీ లక్ష్య ఛేదనలో ముంబై జట్టు విఫలమైంది.

రాషీద్ ఖాన్, నికోలస్ పూరన్ వంటి స్టార్ ఆటగాళ్లు లేకపోవడం ముంబై జట్టుకు తీరని లోటుగా మారింది. వైపర్స్ ఓపెనర్ ఫఖర్ జమాన్ 69 పరుగులతో సహకరించగా, గాస్ తన మెరుపు ఇన్నింగ్స్‌తో ముంబై బౌలర్లను ముప్పుతిప్పలు పెట్టాడు. నిర్ణీత 20 ఓవర్లలో ముంబై ఇండియన్స్ ఎమిరేట్స్ 188 పరుగులు మాత్రమే చేయగలిగింది. 45 పరుగుల తేడాతో విజయం సాధించిన డెజర్ట్ వైపర్స్ ఈ సీజన్ టైటిల్ పోరుకు అర్హత సాధించిన తొలి జట్టుగా నిలిచింది.