2026 సంవత్సరంలో జనవరి 14వ తేదీ మధ్యాహ్నం 3:13 గంటలకు సూర్యుడు మకర రాశిలోకి ప్రవేశించనున్నాడు. ఈ నేపథ్యంలో సంక్రాంతి పుణ్యకాలం సాయంత్రం 5:45 గంటల వరకు ఉంటుంది. సూర్యుడు ఉత్తరాయణ పథంలోకి ప్రవేశించే ఈ పర్వదినాన పవిత్ర నదులలో స్నానం ఆచరించి, సూర్య భగవానుడిని ఆరాధించడం వల్ల అనంతమైన పుణ్యఫలాలు లభిస్తాయి. దేశవ్యాప్తంగా వివిధ పేర్లతో జరుపుకునే ఈ పండుగలో దానధర్మాలకు విశేష ప్రాధాన్యత ఉంది.

జాతకంలో సూర్య దోషం లేదా పితృ దోషం ఉన్నవారికి మకర సంక్రాంతి ఒక గొప్ప అవకాశం. సూర్య దోష నివారణకు రాగి పాత్రలో బెల్లం, ఎర్ర చందనం కలిపి సూర్యుడికి అర్ఘ్యం సమర్పించాలి. అలాగే పితృ దోషాల నుండి విముక్తి పొందడానికి నువ్వులు, బియ్యం, వస్త్రాలను దానం చేస్తూ పితృ తర్పణాలు వదలాలి. ఆవులకు లేదా కాకులకు ఆహారం అందించడం ద్వారా పూర్వీకుల ఆశీస్సులు లభించి, ఇంట్లోని అరిష్టాలు తొలగిపోతాయని పండితులు పేర్కొంటున్నారు.