సిరియా ఆర్థిక వ్యవస్థను గాడిలో పెట్టేందుకు నూతన సంవత్సర కానుకగా అధ్యక్షుడు అహ్మద్ అల్-షారా విప్లవాత్మక నిర్ణయం తీసుకున్నారు. దశాబ్దాల పాటు సాగిన అంతర్యుద్ధం, తీవ్ర ద్రవ్యోల్బణం నేపథ్యంలో పాత కరెన్సీ నోట్లపై ఉన్న మాజీ అధ్యక్షుడు బషర్ అల్-అసద్ మరియు ఆయన కుటుంబ సభ్యుల ఫోటోలను ప్రభుత్వం తొలగించింది. వాటి స్థానంలో సిరియా వ్యవసాయ సంస్కృతికి ప్రతీకలైన గులాబీలు, నారింజలు, పత్తి మరియు గోధుమల చిత్రాలతో కొత్త నోట్లను సోమవారం విడుదల చేశారు. ఇది ఒక వ్యక్తి ఆధిపత్య యుగం ముగిసి, నవ సిరియా జాతీయ గుర్తింపునకు నాంది అని ప్రభుత్వం ప్రకటించింది.

పడిపోతున్న సిరియన్ పౌండ్ విలువను స్థిరీకరించేందుకు నోట్లపై ఉన్న రెండు సున్నాలను తొలగించారు (రీడినోమినేషన్). దీనివల్ల వస్తువుల ధరలు మారకపోయినా, లెక్కలు మరియు నగదు లావాదేవీలు సులభతరం అవుతాయి. గతంలో రష్యాలో ముద్రితమైన అసద్ కాలపు నోట్ల స్థానంలో వచ్చే ఈ కొత్త కరెన్సీ జనవరి 1 నుండి చలామణిలోకి రానుంది. ఈ మార్పు ద్వారా ప్రజల్లో జాతీయ కరెన్సీపై నమ్మకాన్ని పెంచి, డాలర్ వాడకాన్ని తగ్గించాలని ప్రభుత్వం లక్ష్యంగా పెట్టుకుంది.