లండన్‌లోని ఒక ప్రముఖ రెస్టారెంట్‌లో పనిచేస్తున్న తమిళనాడుకు చెందిన మధేష్ రవిచంద్రన్‌ను అక్కడి మేనేజర్ ‘బానిస’ అని పిలుస్తూ జాతి వివక్షతో దూషించాడు. శ్రీలంకకు చెందిన ఆ మేనేజర్ భారతీయులను మోసగాళ్లుగా అభివర్ణించడమే కాకుండా, రవిచంద్రన్‌ను అన్యాయంగా ఉద్యోగం నుంచి తొలగించాడు. ఈ అవమానంపై బాధితుడు న్యాయస్థానాన్ని ఆశ్రయించగా, విచారణ చేపట్టిన కోర్టు ఈ ఘటనను తీవ్రంగా పరిగణించింది.

రవిచంద్రన్‌పై జరిగిన జాతి వివక్ష దాడి నిజమని నిర్ధారించిన న్యాయమూర్తి పాల్ అబాట్, నిందితుడైన మేనేజర్‌కు సుమారు 81.34 లక్షల రూపాయల (67 వేల పౌండ్లు) భారీ జరిమానా విధించారు. బాధితుడికి ఈ మొత్తాన్ని పరిహారంగా చెల్లించాలని ఆదేశిస్తూ, భవిష్యత్తులో ఇలాంటి జాత్యహంకార వ్యాఖ్యలు చేయకూడదని కోర్టు హెచ్చరించింది. విదేశాల్లో భారతీయుల పట్ల అగౌరవంగా ప్రవర్తిస్తే చట్టపరమైన చర్యలు తప్పవని ఈ తీర్పు స్పష్టం చేసింది.