మధ్యప్రదేశ్ రాష్ట్రం మొరేనాలోని పోర్సాలో ఆటపాటల మధ్య జరిగిన తూటా పేలుడు ఒక చిన్నారి ప్రాణాన్ని బలితీసుకుంది. ఇంటి యజమాని లైసెన్స్డ్ 315 బోర్ రైఫిల్‌తో ముగ్గురు పిల్లలు ఆడుకుంటుండగా, 14 ఏళ్ల బాలుడు పొరపాటున ట్రిగ్గర్ నొక్కడంతో 8 ఏళ్ల రిషబ్ తోమర్ తలకు నేరుగా తూటా తగిలింది. దీంతో ఆ బాలుడు అక్కడికక్కడే మృతి చెందాడు. ప్రైవేట్ గార్డుగా పనిచేస్తున్న యజమాని తన తుపాకీని గదిలో ఉంచి బయటకు వెళ్లిన సమయంలో ఈ విషాదం చోటుచేసుకుంది.

అయితే మృతుడి కుటుంబ సభ్యులు ఇది ప్రమాదం కాదు హత్య అని ఆరోపిస్తున్నారు. ఘటనకు వాడిన తుపాకీని యజమాని మార్చివేసి పరారయ్యాడని వారు ఫిర్యాదు చేశారు. పోలీసులు సంఘటనా స్థలానికి చేరుకుని కేసు నమోదు చేశారు. చిన్నపిల్లల ఆటలో జరిగిన పొరపాటా లేక ఇందులో ఏదైనా కుట్ర ఉందా అనే కోణంలో పోలీసులు లోతుగా దర్యాప్తు జరుపుతున్నారు.