కేంద్ర ప్రభుత్వ ఉద్యోగులు, పెన్షనర్ల సుదీర్ఘ నిరీక్షణకు తెరదించుతూ 8వ వేతన సంఘం (8th Pay Commission) ఏర్పాటుకు కేంద్రం అధికారికంగా గ్రీన్ సిగ్నల్ ఇచ్చింది. నవంబర్ 3, 2025 న ఈ కమిషన్‌ను అధికారికంగా నోటిఫై చేశారు. జస్టిస్ రంజనా ప్రకాష్ దేశాయ్ ఛైర్‌పర్సన్‌గా వ్యవహరించనున్నారు. ప్రొఫెసర్ పులక్ ఘోష్ మరియు పంకజ్ జైన్ సభ్యులుగా ఉంటారు. ఈ ప్రకటన ఉద్యోగులకు గొప్ప ఉపశమనాన్నిచ్చింది.

అయితే, డియర్‌నెస్ అలవెన్స్ (DA) మరియు డియర్‌నెస్ రిలీఫ్ (DR)లను మూల వేతనంలో విలీనం చేస్తారనే చర్చకు ప్రభుత్వం తెరదించింది. ఆర్థిక శాఖ సహాయ మంత్రి పంకజ్ చౌదరి పార్లమెంటులో మాట్లాడుతూ, డీఏ లేదా డీఆర్-ను మూల వేతనంలో విలీనం చేసే ప్రతిపాదన ప్రస్తుతం ప్రభుత్వ పరిశీలనలో లేదని స్పష్టం చేశారు. అంటే, డీఏ 50% దాటినా అది ఆటోమేటిక్‌గా మూల వేతనంలో కలవదు. అయినప్పటికీ, ప్రతి ఆరు నెలలకు ఒకసారి AICPI-IW ఇండెక్స్ ఆధారంగా పెరిగిన రేటుతో డీఏ కొనసాగుతుంది.