హర్యానాలోని ఫరీదాబాద్ కోర్టు ఒక సంచలన అత్యాచార కేసులో నిందితుడిని నిర్దోషిగా ప్రకటిస్తూ కీలక తీర్పు వెలువరించింది. పెళ్లి చేసుకుంటానని నమ్మించి మోసం చేశాడంటూ 2022లో ఒక మహిళ చేసిన ఫిర్యాదుతో సదరు యువకుడు ఏడు నెలల పాటు జైలు శిక్ష అనుభవించాడు. అయితే దాదాపు మూడేళ్ల విచారణ అనంతరం వారిద్దరి మధ్య ఉన్నది బలవంతపు సంబంధం కాదని పరస్పర అంగీకారంతో కూడిన బంధమని న్యాయస్థానం స్పష్టం చేసింది.

విచారణలో భాగంగా వీరిద్దరూ వివిధ హోటళ్లలో 40 నుండి 50 సార్లు కలుసుకున్నట్లు ఆధారాలు లభించాయి. ఫిర్యాదు చేసిన మహిళకు గతంలోనే విడాకులు అవ్వగా నిందితుడు పెళ్లయిన వ్యక్తి అని కోర్టు గుర్తించింది. ప్రాసిక్యూషన్ సరైన సాక్ష్యాలను సమర్పించడంలో విఫలం కావడంతో మరియు ఆ సంబంధం ఇష్టపూర్వకంగానే సాగిందని భావించిన న్యాయమూర్తి యువకుడిపై ఉన్న అన్ని ఆరోపణలను కొట్టివేస్తూ అతడిని విడుదల చేశారు.