బంగ్లాదేశ్‌లో 2026 ఎన్నికల నేపథ్యంలో మతపరమైన హింస పెచ్చరిల్లుతుండటం ఆందోళన కలిగిస్తోంది. మహమ్మద్ యూనస్ నేతృత్వంలోని తాత్కాలిక ప్రభుత్వం అధికారంలోకి వచ్చినప్పటి నుండి హిందువులపై దాడులు పెరిగినట్లు నివేదికలు స్పష్టం చేస్తున్నాయి. భారత విదేశీ వ్యవహారాల శాఖ వెల్లడించిన గణాంకాల ప్రకారం, 2024 ఆగస్టు నుండి ఇప్పటివరకు 23 మంది హిందువులు మరణించగా, 152 ఆలయాలపై దాడులు జరిగాయి. మైనారిటీల భద్రత కోసం ప్రభుత్వం వద్ద సరైన ప్రణాళిక లేకపోవడంతో హిందూ సమాజం భయాందోళనల మధ్య జీవిస్తోంది.

అమెరికాకు చెందిన మత స్వేచ్ఛ కమిషన్ (USCIRF) బంగ్లాదేశ్‌లో పర్యటించి, అక్కడి మైనారిటీలు తమ ప్రాణాలకు రక్షణ లేదని భావిస్తున్నట్లు వెల్లడించింది. అవామీ లీగ్‌పై నిషేధం విధించడంతో మత ఛాందసవాద శక్తులు మరింత బలోపేతం అవుతున్నాయని నివేదిక పేర్కొంది. దాడులకు సంబంధించి 88 కేసులు నమోదైనప్పటికీ, క్షేత్రస్థాయిలో హిందువులకు భరోసా కరువైంది. బంగ్లాదేశ్‌లోని హిందువుల ఆస్తులు, ఆలయాల రక్షణకు కట్టుదిట్టమైన చర్యలు తీసుకోవాలని భారత ప్రభుత్వం స్పష్టమైన డిమాండ్ వినిపించింది.