బంగ్లాదేశ్‌లో భారత్ వ్యతిరేక ప్రచారాలు జరుగుతున్నప్పటికీ ఆ దేశ తాత్కాలిక ప్రభుత్వం ఆహార భద్రత కోసం మళ్ళీ భారత్‌నే ఆశ్రయించింది. దేశంలో బియ్యం కొరతను తీర్చి ధరలను అదుపులోకి తెచ్చేందుకు భారత్ నుండి మరో 50,000 టన్నుల నాన్-బాస్మతి ఉడికించిన బియ్యాన్ని దిగుమతి చేసుకోవాలని యూనస్ ప్రభుత్వం నిర్ణయించింది. భారతీయ సంస్థ బగాడియా బ్రదర్స్ ప్రైవేట్ లిమిటెడ్ ద్వారా సుమారు 220 కోట్ల రూపాయల విలువైన ఈ ఒప్పందానికి ఆమోదం లభించింది.

ఇటీవలే ఉల్లి ధరల నియంత్రణ కోసం పాకిస్తాన్ మరియు టర్కీలను ఆశ్రయించినా ఫలితం లేకపోవడంతో బంగ్లాదేశ్ మళ్ళీ భారత్ నుండి దిగుమతులు చేసుకుంది. ఇప్పుడు బియ్యం విషయంలోనూ అదే బాట పట్టింది. రాజకీయ ఉద్రిక్తతలు ఉన్నప్పటికీ నిత్యావసర వస్తువుల సరఫరా కోసం భారత్‌పై ఆధారపడక తప్పని పరిస్థితి నెలకొందని ఈ నిర్ణయం స్పష్టం చేస్తోంది. దేశీయ మార్కెట్ స్థిరత్వం కోసం ప్రభుత్వం ఈ కీలక చర్య తీసుకుంది.