ఉత్తరప్రదేశ్‌లోని సహారన్‌పూర్‌లో ఉమా అనే మహిళ హత్య కేసు దేశవ్యాప్తంగా సంచలనం సృష్టిస్తోంది. తన ప్రియుడు బిలాల్ కోసం భర్తను, 13 ఏళ్ల కుమారుడిని వదులుకున్న ఉమాను, అదే ప్రియుడు అత్యంత కిరాతకంగా తల నరికి హత్య చేశాడు. వేరే యువతిని వివాహం చేసుకోవడానికి ఉమా అడ్డుగా ఉందన్న కారణంతో, బిలాల్ ఆమెను హర్యానాలోని ఒక అడవి ప్రాంతానికి తీసుకెళ్లి ఈ ఘాతుకానికి ఒడిగట్టాడు. హత్య అనంతరం ఏమీ తెలియనట్టు తన పెళ్లి పనుల్లో నిమగ్నమైన నిందితుడిని పోలీసులు ఎట్టకేలకు అరెస్ట్ చేశారు.

సుమారు 15 ఏళ్ల క్రితం ప్రేమించిన వ్యక్తి కోసం ఇంట్లో నుంచి పారిపోయి వివాహం చేసుకున్న ఉమా, రెండేళ్ల క్రితం టాక్సీ డ్రైవర్ బిలాల్‌తో పరిచయం పెంచుకుని సహజీవనం చేస్తోంది. అయితే తనను వదిలించుకోవాలని చూసిన బిలాల్, పథకం ప్రకారం ఆమెను హతమార్చి తల వేరు చేశాడు. నిందితుడు చూపిన గుర్తుల ఆధారంగా పోలీసులు అడవిలో పారేసిన ఉమా తల భాగాన్ని స్వాధీనం చేసుకున్నారు. ప్రేమ కోసం కుటుంబాన్ని వదిలేసిన మహిళకు ఇలాంటి విషాదాంతం ఎదురుకావడం స్థానికంగా కలకలం రేపుతోంది.