బంగ్లాదేశ్‌లోని మైమన్సింగ్‌లో దీపు చంద్ర దాస్‌ను అతి దారుణంగా కొట్టి, తగులబెట్టిన ఘటనపై భారత్ తీవ్రంగా స్పందించింది. నిందితులను కఠినంగా శిక్షించాలని విదేశీ వ్యవహారాల శాఖ ప్రతినిధి రణధీర్ జైస్వాల్ డిమాండ్ చేశారు. ఢిల్లీలోని బంగ్లాదేశ్ హైకమిషన్ వద్ద భద్రతా ఉల్లంఘనలు జరగలేదని స్పష్టం చేస్తూనే, అక్కడి మైనారిటీల రక్షణపై యూనస్ ప్రభుత్వానికి కఠిన సందేశం పంపారు.

విచారణలో దీపుపై వచ్చిన మతపరమైన ఆరోపణలు అబద్ధమని తేలింది. ఎటువంటి ఆధారాలు లేకుండానే అతడిని మూకదాడిలో చంపినట్లు ఉన్నతాధికారులు ధృవీకరించారు. ఈ కేసులో ఇప్పటికే ఏడుగురిని అరెస్ట్ చేశారు. అంతర్జాతీయ నిబంధనల ప్రకారం దౌత్య కార్యాలయాల భద్రతను కాపాడుతూనే, మైనారిటీలపై జరుగుతున్న దాడుల పట్ల భారత్ తన ఆందోళనను వ్యక్తం చేసింది.