హైదరాబాద్‌కు చెందిన ప్రముఖ వ్యాపారవేత్త బి. శ్రీధర్ తిరుమల తిరుపతి దేవస్థానానికి రూ. 1.02 కోట్ల విలువైన బ్లేడ్లను విరాళంగా అందజేశారు. తిరుమలలో భక్తులు మొక్కుల రూపంలో సమర్పించే తలనీలాల కార్యక్రమం ‘కళ్యాణకట్ట’ కోసం వీటిని ఉపయోగించనున్నారు. శ్రీవారిని దర్శించుకునే భక్తులు తమ కోరికలు నెరవేరాలని తలనీలాలు సమర్పించడం ఇక్కడ అనాదిగా వస్తున్న ఆచారం.

తిరుమలలో ప్రతిరోజూ సగటున 40 వేల మంది భక్తులు తలనీలాలు సమర్పిస్తుంటారు. ఈ ప్రక్రియ కోసం ఏడాదికి సుమారు రూ. 1.1 కోట్ల విలువైన బ్లేడ్లు అవసరమవుతాయని టీటీడీ చైర్మన్ బి.ఆర్. నాయుడు తెలిపారు. శ్రీధర్ చేసిన ఈ భారీ విరాళం వల్ల రాబోయే ఏడాది కాలానికి అవసరమైన బ్లేడ్ల కొరత తీరనుంది. ప్రస్తుతం ఈ పవిత్ర కార్యం కోసం దేవస్థానం వేల సంఖ్యలో క్షౌరకులను నియమించి సేవలను అందిస్తోంది.