శిశువుకు తల్లి పాలు పట్టడం వల్ల కేవలం బిడ్డకే కాకుండా, తల్లికి కూడా అద్భుతమైన ఆరోగ్య ప్రయోజనాలు ఉన్నాయని ఆస్ట్రేలియాలోని మెల్బోర్న్ విశ్వవిద్యాలయ శాస్త్రవేత్తలు వెల్లడించారు. మహిళల్లో సాధారణంగా కనిపించే ‘ట్రిపుల్-నెగటివ్’ రొమ్ము క్యాన్సర్ రాకుండా తల్లి పాలు రక్షణ కల్పిస్తాయని వారి పరిశోధనలో తేలింది. బిడ్డ పుట్టిన తర్వాత తల్లి శరీరంలో సహజంగానే క్యాన్సర్ కణాలను ఎదుర్కొనే రోగనిరోధక శక్తి పెరుగుతుందని, ఇది ప్రాణాంతక వ్యాధుల నుండి మహిళలను కాపాడుతుందని ఈ అధ్యయనం స్పష్టం చేస్తోంది.

శాస్త్రవేత్తల విశ్లేషణ ప్రకారం, ప్రసవం తర్వాత మహిళల రొమ్ము భాగంలో ‘CD8+T’ అనే ప్రత్యేకమైన రోగనిరోధక కణాలు అభివృద్ధి చెందుతాయి. ఈ కణాలు శరీరంలో రక్షణ సైనికుల్లా పనిచేస్తూ, క్యాన్సర్ కారక కణాలను ఎప్పటికప్పుడు గుర్తించి నాశనం చేస్తాయి. రొమ్ము క్యాన్సర్ వ్యాప్తిని అడ్డుకోవడంలో ఈ ప్రక్రియ కీలక పాత్ర పోషిస్తుందని పరిశోధకులు వివరించారు. ఈ సహజసిద్ధమైన రక్షణ వ్యవస్థ వల్ల పాలు ఇచ్చే తల్లుల్లో క్యాన్సర్ వచ్చే అవకాశాలు గణనీయంగా తగ్గుతాయని ఈ తాజా పరిశోధన ద్వారా నిర్ధారణ అయింది.