పాన్ కార్డును ఆధార్‌తో అనుసంధానం చేయాలని ఆదాయపు పన్ను శాఖ పన్ను చెల్లింపుదారులను హెచ్చరించింది. జనవరి 1, 2026 లోపు ఈ ప్రక్రియ పూర్తి చేయకపోతే మీ పాన్ కార్డ్ ‘నిష్క్రియ’ స్థితికి చేరుకుంటుంది. దీనివల్ల ఇన్‌కమ్ టాక్స్ రిటర్న్స్ దాఖలు చేయడం నిలిచిపోవడమే కాకుండా, పెండింగ్‌లో ఉన్న రీఫండ్‌లు కూడా ఆగిపోతాయి. కొత్త బ్యాంక్ ఖాతాలు తెరవడం, స్టాక్ మార్కెట్ పెట్టుబడులు వంటి ఆర్థిక లావాదేవీలకు తీవ్ర ఆటంకాలు ఏర్పడే ప్రమాదం ఉంది.

పాన్ కార్డు చెల్లుబాటులో లేకపోతే మీ లావాదేవీలపై భారీగా టీడీఎస్ కోతలు విధిస్తారు. మీ పాన్-ఆధార్ లింక్ అయిందో లేదో తెలుసుకోవడానికి ఆదాయపు పన్ను శాఖ పోర్టల్‌లో స్టేటస్ చెక్ చేసుకోవచ్చు. ఒకవేళ లింక్ కానట్లయితే, రూ. 1,000 ఆలస్య రుసుము చెల్లించి వెంటనే ఈ ప్రక్రియను పూర్తి చేయాలని అధికారులు సూచిస్తున్నారు. గడువు ముగిసేలోపే స్పందించి మీ ఆర్థిక లావాదేవీలను సురక్షితం చేసుకోండి.