థాయ్‌లాండ్‌తో సరిహద్దు ఉద్రిక్తతల వేళ చైనా ఆయుధాలను నమ్ముకున్న కంబోడియాకు భారీ షాక్ తగిలింది. చైనా తయారీ ఎం270 మల్టిపుల్ లాంచ్ రాకెట్ సిస్టమ్ ద్వారా ప్రయోగాలు చేస్తున్న సమయంలో, ఒక రాకెట్ లాంచర్‌లోనే చిక్కుకుపోయి భారీ శబ్దంతో పేలిపోయింది. ఈ ప్రమాదంలో ఎనిమిది మంది కంబోడియా సైనికులు అక్కడికక్కడే ప్రాణాలు కోల్పోయారు. భారత్ కు చెందిన పినాకాతో సమానమని చైనా గొప్పలు చెప్పుకునే ఈ వ్యవస్థ విఫలం కావడంతో ప్రపంచవ్యాప్తంగా విమర్శలు వ్యక్తమవుతున్నాయి.

గతంలో పాకిస్థాన్ ప్రయోగించిన చైనా మిసైళ్లు, డ్రోన్లు లక్ష్యాన్ని చేరకుండానే కుప్పకూలిన సంఘటనలు వెలుగులోకి వచ్చాయి. తాజాగా కంబోడియాలో జరిగిన ఈ ఘోర ప్రమాదం చైనా ఆయుధాల నాణ్యతను మరోసారి ఎండగట్టింది. చైనా నుండి దిగుమతి చేసుకున్న చౌకబారు యుద్ధ సామాగ్రి వల్ల సొంత సైనికుల ప్రాణాలకే ముప్పు వాటిల్లుతోందని రక్షణ రంగ నిపుణులు హెచ్చరిస్తున్నారు. ఈ ఘటనకు సంబంధించిన వీడియో సోషల్ మీడియాలో వైరల్ కావడంతో చైనా తయారీ వస్తువులపై నెటిజన్లు సెటైర్లు వేస్తున్నారు.