సెర్వికల్ క్యాన్సర్‌ను నివారించేందుకు కేంద్ర ప్రభుత్వం దేశవ్యాప్తంగా 14 ఏళ్ల బాలికలకు ఉచితంగా హెచ్‌పీవీ (HPV) వ్యాక్సిన్ అందించాలని నిర్ణయించింది. 2024 బడ్జెట్ హామీ మేరకు రానున్న కొద్ది రోజుల్లోనే ఈ బృహత్తర కార్యక్రమం ప్రారంభం కానుంది. 2027 నాటికి సుమారు 2.6 కోట్ల వ్యాక్సిన్ డోసులను పంపిణీ చేయాలని ప్రభుత్వం లక్ష్యంగా పెట్టుకుంది.

బహిరంగ మార్కెట్లో సుమారు ₹3,927 విలువ చేసే ‘గార్డాసిల్’ వ్యాక్సిన్‌ను ప్రభుత్వం ఉచితంగా అందిస్తుంది. ఈ వయస్సులో ఒక డోస్ టీకా తీసుకోవడం వల్ల దీర్ఘకాలిక రక్షణ లభిస్తుందని నిపుణులు చెబుతున్నారు. ఈ చొరవ ద్వారా దేశంలో ఏటా వేల సంఖ్యలో సంభవిస్తున్న క్యాన్సర్ మరణాలను అడ్డుకోవచ్చని వైద్యులు ఆశాభావం వ్యక్తం చేస్తున్నారు.