పల్నాడు జిల్లాలోని ప్రముఖ పుణ్యక్షేత్రం కోటప్పకొండలో మహాశివరాత్రి పర్వదినాన్ని పురస్కరించుకుని త్రికోటేశ్వర స్వామి దర్శన టికెట్లను నేటి నుంచి ఆన్‌లైన్ లో అందుబాటులోకి తీసుకువచ్చారు. భక్తులు అధికారిక వెబ్‌సైట్ ద్వారా తమ టికెట్లను బుక్ చేసుకోవచ్చని ఆలయ ఈవో చంద్రశేఖర్ వెల్లడించారు. అభిషేకం టికెట్ ధర 500 రూపాయలుగా ఉండగా, శీఘ్ర దర్శనం కోసం 200 రూపాయలు మరియు ప్రత్యేక దర్శనం కోసం 100 రూపాయలుగా నిర్ణయించారు. భక్తుల రద్దీని దృష్టిలో ఉంచుకుని దర్శన ఏర్పాట్లలో అధికారులు పకడ్బందీ చర్యలు చేపడుతున్నారు.

ఈ ఏడాది మహాశివరాత్రి వేడుకల సందర్భంగా భక్తుల రద్దీని క్రమబద్ధీకరించడానికి విఐపి ఉచిత పాసులను పూర్తిగా రద్దు చేస్తున్నట్లు ఆలయ యంత్రాంగం ప్రకటించింది. దీనికి బదులుగా 300 రూపాయలకే విఐపి దర్శన టికెట్లను విక్రయించనున్నారు. సాధారణ భక్తులకు ఎటువంటి ఇబ్బందులు కలగకుండా దర్శనం కల్పించాలనే ఉద్దేశంతోనే ఈ నిర్ణయం తీసుకున్నట్లు సమాచారం. భక్తులు ఈ అవకాశాన్ని వినియోగించుకుని ముందుగానే టికెట్లు బుక్ చేసుకోవాలని అధికారులు సూచించారు.