అమెరికా-భారత్ వాణిజ్య ఒప్పందంలో భాగంగా భారతీయ వస్త్ర రంగానికి భారీ ఊరట లభించే సూచనలు కనిపిస్తున్నాయి. బంగ్లాదేశ్‌కు అమెరికా కల్పిస్తున్న తరహాలోనే, భారతీయ దుస్తుల ఎగుమతులపై కూడా సుంకాల మినహాయింపు లభించే అవకాశం ఉందని కేంద్ర మంత్రి పీయూష్ గోయల్ వెల్లడించారు. ముఖ్యంగా అమెరికా నుంచి దిగుమతి చేసుకున్న పత్తితో తయారు చేసిన దుస్తులకు ‘జీరో-టారిఫ్’ ప్రయోజనం కల్పించే దిశగా చర్చలు సాగుతున్నాయి.

భారతదేశం నుండి ఎగుమతయ్యే మొత్తం వస్త్రాలలో 30 శాతం వాటా అమెరికాదే. ఈ కొత్త వాణిజ్య ఒప్పందం వల్ల భారతీయ టెక్స్టైల్ రంగంలో నెలకొన్న ఆందోళనలు తొలగిపోతాయని మంత్రి ఆశాభావం వ్యక్తం చేశారు. ట్రంప్ పరిపాలనలో భారత్‌కు ఈ రాయితీలు లభిస్తే, అంతర్జాతీయ మార్కెట్లో మన దేశీ వస్త్ర పరిశ్రమ మరింత బలోపేతం కావడమే కాకుండా, ఉపాధి అవకాశాలు కూడా మెరుగుపడతాయి.