జార్ఖండ్‌లోని హజారీబాగ్‌లో అడవి ఏనుగుల మంద జరిపిన దాడిలో ఒకే కుటుంబానికి చెందిన నలుగురితో సహా మొత్తం ఆరుగురు గ్రామస్థులు మరణించారు. శుక్రవారం తెల్లవారుజామున చుర్చు బ్లాక్ పరిధిలోని గోంద్వార్ గ్రామంలో ఈ విషాదం చోటుచేసుకుంది. ఏనుగులు వస్తున్నాయని అటవీ శాఖ మైకులో హెచ్చరించడంతో, భయంతో ఇళ్ల నుండి బయటకు పరుగులు తీసిన ప్రజలు నేరుగా ఏనుగుల ముందు పడటంతో ఈ ఘోరం జరిగింది.

ఈ దాడిలో తీవ్రంగా గాయపడిన ఒక చిన్నారి ఆసుపత్రిలో చికిత్స పొందుతోంది. ఏనుగుల మందను అడవిలోకి పంపేందుకు అటవీ శాఖ క్విక్ రెస్పాన్స్ టీమ్‌ను రంగంలోకి దించింది. ఈ ఏనుగుల మంద పశ్చిమ బెంగాల్‌లోని జంగల్‌మహల్ ప్రాంతంలోకి కూడా ప్రవేశించే అవకాశం ఉండటంతో సరిహద్దు గ్రామాల్లో ప్రస్తుతం తీవ్ర భయాందోళనలు నెలకొన్నాయి.