అజ్మీర్ షరీఫ్ దర్గాలో ప్రధానమంత్రి కార్యాలయం తరపున ఏటా సమర్పించే చాదర్ సంప్రదాయాన్ని నిలిపివేయాలని దాఖలైన పిటిషన్‌పై అత్యవసర విచారణకు సుప్రీంకోర్టు నిరాకరించింది. విశ్వ వేద సనాతన సంఘ్ దాఖలు చేసిన ఈ ప్రజాహిత వాజ్యంపై విచారణను వెకేషన్ బెంచ్ డిసెంబర్ 26 లేదా 29కి వాయిదా వేసింది. ప్రస్తుతానికి ఈ సంప్రదాయంపై ఎటువంటి స్టే ఇవ్వడానికి న్యాయస్థానం సుముఖత వ్యక్తం చేయలేదు.

ప్రధాని నరేంద్ర మోదీ తరపున కేంద్ర మైనారిటీ వ్యవహారాల మంత్రి కిరణ్ రిజిజు ఈ చాదర్‌ను దర్గాలో సమర్పించనున్నారు. దేశాభివృద్ధి, ప్రజల శ్రేయస్సు కోసమే ఈ చాదర్ సమర్పిస్తున్నామని, ఇందులో రాజకీయం లేదని రిజిజు స్పష్టం చేశారు. కోర్టు నుండి ఎలాంటి స్టే రాకపోవడంతో, నిర్ణీత షెడ్యూల్ ప్రకారం ఉర్స్ ఉత్సవాల్లో భాగంగా చాదర్ సమర్పణ కార్యక్రమం కొనసాగనుంది.