தமிழக சட்டமன்றத் தேர்தலில் திமுக கூட்டணியில் சிபிஐ கட்சிக்கு 5 தொகுதிகள் ஒதுக்கீடு செய்யப்பட்டுள்ளன. முதல்வர் ஸ்டாலினின் நேரடி வேண்டுகோளை ஏற்று, ஒரு தொகுதியை விட்டுக் கொடுக்க சம்மதித்ததாக சிபிஐ மாநிலச் செயலாளர் வீரபாண்டியன் விளக்கம் அளித்துள்ளார். பாஜகவை வீழ்த்துவதே தங்களின் முதன்மையான இலக்கு என்றும், தொகுதி பங்கீட்டில் திமுக தங்களுக்கு எந்தவித அழுத்தமும் கொடுக்கவில்லை என்றும் அவர் செய்தியாளர்களிடம் தெளிவுபடுத்தினார்.

கூட்டணியில் கூடுதல் கட்சிகள் இணைந்திருப்பதால் நிலவும் சூழலை முதல்வர் விளக்கிக் கூறியதாக வீரபாண்டியன் தெரிவித்தார். கடந்த முறை 6 இடங்களில் போட்டியிட்ட நிலையில், இந்த முறை எண்ணிக்கை குறைந்தாலும் ஜனநாயகத்தை காக்க இந்த முடிவை எடுத்துள்ளதாக அவர் கூறினார். சுயமரியாதைக்கு பாதிப்பு ஏற்படாத வகையில் திமுகவின் அணுகுமுறை இருந்ததாலேயே, இந்த ஒப்பந்தம் சுமுகமாக கையெழுத்தானது என அவர் குறிப்பிட்டார்.