மகாராஷ்டிராவின் பால்கர் மாவட்டத்தில் உள்ள ஜவஹர் பகுதியில் எஸ்பிஐ வங்கி அதிகாரியின் துரித நடவடிக்கையால் 111 கோடி ரூபாய்க்கும் அதிகமான நிதி மோசடி தடுக்கப்பட்டுள்ளது. பிடபிள்யூடி துறையின் கணக்கிலிருந்து 111.63 கோடி ரூபாயை எடுப்பதற்காக போலி காசோலை ஒன்று வங்கியில் சமர்ப்பிக்கப்பட்டது. காசோலையில் தொகையைக் குறிப்பிட ‘மில்லியன்’ மற்றும் ‘பில்லியன்’ போன்ற சொற்கள் பயன்படுத்தப்பட்டிருந்ததும், அரசு அதிகாரிகள் யாரும் நேரில் வராமல் மூன்றாம் நபர் மூலம் காசோலை வந்ததும் வங்கி அதிகாரிக்கு சந்தேகத்தை ஏற்படுத்தியது. அவர் உடனடியாக துறையைத் தொடர்பு கொண்டபோது அது போலி என்பது உறுதியானது.

இந்தச் சதித்திட்டத்தில் பிடபிள்யூடி துறையின் ஒப்பந்த ஊழியர் மற்றும் உள்ளூர் ஒப்பந்ததாரர் ஒருவருக்குத் தொடர்பு இருப்பது விசாரணையில் தெரியவந்துள்ளது. அவர்கள் இருவரையும் போலீசார் கைது செய்துள்ளனர். அரசு டெண்டர்களுக்காக வைக்கப்பட்டிருந்த மக்கள் பணத்தைக் கொள்ளையடிக்க இவர்கள் திட்டமிட்டது அம்பலமாகியுள்ளது. வங்கி அதிகாரியின் விழிப்புணர்வால் இந்த மிகப்பெரிய நிதி இழப்பு தவிர்க்கப்பட்டுள்ளது. தற்போது போலீசார் இச்சம்பவத்தில் தொடர்புடைய மற்ற நபர்கள் குறித்து தீவிர விசாரணை நடத்தி வருகின்றனர்.