தி ஹண்ட்ரட் ஏலத்தில் பாகிஸ்தான் வீரர் அப்ரார் அகமதுவை சன்ரைசர்ஸ் லீட்ஸ் அணி தேர்வு செய்ததை இந்திய ஜாம்பவான் சுனில் கவாஸ்கர் கடுமையாக விமர்சித்துள்ளார். பாகிஸ்தான் வீரர்களுக்கு வழங்கப்படும் ஊதியம் வரியாக அந்த நாட்டு அரசாங்கத்திற்கு செல்கிறது என்றும், அந்தப் பணம் இந்தியாவிற்கு எதிராக ஆயுதங்கள் வாங்க பயன்படுத்தப்படுவதாகவும் அவர் குற்றம் சாட்டியுள்ளார். இது மறைமுகமாக இந்திய வீரர்களின் உயிரிழப்பிற்கு வழிவகுக்கும் என்று அவர் எச்சரித்துள்ளார்.

மும்பை பயங்கரவாத தாக்குதலுக்குப் பிறகு ஐபிஎல் தொடரில் பாகிஸ்தான் வீரர்கள் புறக்கணிக்கப்படுவதை சுட்டிக்காட்டிய கவாஸ்கர், இந்திய உரிமையாளர்கள் லாபத்தை விட நாட்டு மக்களின் பாதுகாப்பிற்கு முக்கியத்துவம் அளிக்க வேண்டும் என்றார். சன்ரைசர்ஸ் சிஇஓ காவ்யா மாறனை மறைமுகமாக சாடிய அவர், இந்தியர்களின் உயிருக்கு விலை பேசும் இத்தகைய முடிவுகள் தவிர்க்கப்பட வேண்டும் என்று தனது கட்டுரையில் ஆவேசமாக குறிப்பிட்டுள்ளார்.