2026 டி20 உலகக்கோப்பை தொடரின் தனது முதல் போட்டியில் அயர்லாந்து அணிக்கு எதிராக 67 ரன்கள் வித்தியாசத்தில் ஆஸ்திரேலியா அபார வெற்றி பெற்றுள்ளது. ஆனால், இந்த வெற்றிக் கொண்டாட்டங்களுக்கு இடையே ஆஸ்திரேலிய அணிக்கு பேரிடியாக ஒரு செய்தி கிடைத்துள்ளது. அந்த அணியின் கேப்டன் மிட்செல் மார்ஷ் பயிற்சியின் போது ஏற்பட்ட விசித்திரமான காயத்தால் அவதிப்பட்டு வருகிறார். இதன் காரணமாக, உலகக்கோப்பை அணியில் முதலில் தேர்வு செய்யப்படாத நட்சத்திர வீரர் ஸ்டீவ் ஸ்மித், தற்போது அவசரமாக இலங்கைக்கு அழைக்கப்பட்டுள்ளார்.

பயிற்சியின் போது நேர்ந்த விபத்து

அயர்லாந்து போட்டிக்கு முன்னதாக நடந்த பயிற்சியின் போது, மிட்செல் மார்ஷின் இடுப்புப் பகுதியில் (Groin area) பந்து பலமாகத் தாக்கியது. அவருக்கு மேற்கொள்ளப்பட்ட ஸ்கேன் பரிசோதனையில், விதைப்பை பகுதியில் (testicles) ரத்தம் உறைந்திருப்பது உறுதி செய்யப்பட்டுள்ளது. இதுகுறித்து கிரிக்கெட் ஆஸ்திரேலியா வெளியிட்டுள்ள அறிக்கையில், “மார்ஷ் அந்தப் பகுதியில் கடுமையான வலியை அனுபவித்து வருகிறார். அவரது இயக்கம் தற்போது மிகவும் குறைவாகவே உள்ளது. ஓய்வு தேவைப்படுவதால் அவர் மருத்துவக் கண்காணிப்பில் வைக்கப்பட்டுள்ளார்” எனத் தெரிவிக்கப்பட்டுள்ளது.

வருத்தத்தில் சக வீரர்கள்

அயர்லாந்துக்கு எதிரான வெற்றிக்குப் பிறகு ஆஸ்திரேலிய வேகப்பந்து வீச்சாளர் நாதன் எல்லிஸ் தனது கேப்டனின் நிலை குறித்து வருத்தம் தெரிவித்தார். “கடந்த சில நாட்களாக அவர் வலியுடன் போராடி வருகிறார். அந்தப் பகுதியில் அடிபடுவது எவ்வளவு வேதனையானது என்பது எங்களுக்குத் தெரியும். யாருக்கும் இப்படி ஒரு நிலை ஏற்படக்கூடாது. அவர் இல்லாதது அணிக்கு ஒரு பின்னடைவுதான், ஆனாலும் நாங்கள் ஆட்டத்தில் கவனம் செலுத்தி வருகிறோம்” என்று அவர் கூறினார்.

கோல்ஃப் விளையாடிக் கொண்டிருந்த ஸ்மித்

டி20 உலகக்கோப்பைக்கான ஆஸ்திரேலிய அணியில் ஸ்டீவ் ஸ்மித் முதலில் சேர்க்கப்படவில்லை. இதனால் அவர் அடிலெய்டில் நிம்மதியாக கோல்ஃப் விளையாடிக் கொண்டிருந்தார். இந்நிலையில், மார்ஷின் காயம் காரணமாக ஆஸ்திரேலிய நிர்வாகம் உடனடியாக ஸ்மித்தை கொழும்பு வருமாறு அழைப்பு விடுத்துள்ளது.

முன்னாள் வீரர் மார்க் வா தனது எக்ஸ் தளத்தில், “தாமதமானாலும் பரவாயில்லை ஸ்மித், உடனடியாக கிளம்பிச் செல்லுங்கள்” எனப் பதிவிட்டுள்ளார். ஸ்மித் ஒரு உலகத்தரம் வாய்ந்த வீரர் என்றாலும், ஆஸ்திரேலிய அணியின் டாப் ஆர்டர் பேட்ஸ்மேன்கள் தற்போது சிறப்பான ஃபார்மில் இருப்பதால், ஸ்மித் ஆடும் லெவனில் எந்த இடத்தில் களமிறங்குவார் என்பது பெரும் கேள்விக்குறியாகவே உள்ளது.

அடுத்தடுத்த போட்டிகள்

ஆஸ்திரேலிய அணியின் அடுத்த லீக் போட்டி பிப்ரவரி 13-ஆம் தேதி ஜிம்பாப்வேக்கு எதிராக நடைபெற உள்ளது. அதனைத் தொடர்ந்து இலங்கை மற்றும் ஓமன் அணிகளை ஆஸ்திரேலியா எதிர்கொள்கிறது. கேப்டன் மார்ஷ் குணமடைவதில் இன்னும் நிச்சயமற்ற நிலை நீடிப்பதால், ஸ்மித்தின் வருகை அணிக்கு கூடுதல் பலத்தை அளிக்கும் என எதிர்பார்க்கப்படுகிறது.