தமிழக சட்டமன்றத் தேர்தலை முன்னிட்டு சென்னை மாவட்டத்திலுள்ள 16 தொகுதிகளில் மொத்தம் 4,079 வாக்குச்சாவடிகள் அமைக்கப்பட்டுள்ளன. இதில் 835 சாவடிகள் பதற்றமானவை என கண்டறியப்பட்டுள்ளதாக மாவட்ட தேர்தல் அதிகாரி குமரகுருபரன் தெரிவித்துள்ளார். இந்த மையங்களில் மத்திய ஆயுத காவல் படையினர் பாதுகாப்பு பணியில் ஈடுபடுத்தப்படுவதுடன், சிசிடிவி கேமராக்கள் மூலம் நேரடி கண்காணிப்பு மேற்கொள்ளப்படும்.

ஏப்ரல் 23-ல் வாக்குப்பதிவு நடைபெறவுள்ள நிலையில், மார்ச் 30 முதல் வேட்புமனு தாக்கல் தொடங்குகிறது. கடந்த காலங்களில் வாக்குப்பதிவு குறைவாக இருந்த தியாகராய நகர் மற்றும் ஆயிரம் விளக்கு பகுதிகளில் விழிப்புணர்வு பணிகள் தீவிரப்படுத்தப்பட்டுள்ளன. இம்முறை சென்னையில் 80 சதவீத வாக்குப்பதிவை இலக்காகக் கொண்டு தேர்தல் ஆணையம் அனைத்து பாதுகாப்பு ஏற்பாடுகளையும் தயார் நிலையில் வைத்துள்ளது.