ஹாங்காங் மற்றும் சிங்கப்பூரைத் தொடர்ந்து, தற்போது இந்தியாவிலும் புகழ்பெற்ற மசாலா பிராண்டுகள் விற்பனை செய்யும் பொருட்களில் அபாயகரமான ரசாயனங்கள் கலந்திருப்பது உறுதி செய்யப்பட்டுள்ளது. ராஜஸ்தான் அரசு நடத்திய சோதனையில் எம்டிஎச், எவரெஸ்ட், கஜானந்த், ஷியாம் மற்றும் ஷீபா தாஜா ஆகிய முன்னணி நிறுவனங்களின் மசாலா மாதிரிகள் தரமற்றவை என கண்டறியப்பட்டுள்ளன. இவற்றில் அசிடாமிப்ரிட் மற்றும் தியாமெதோக்சம் போன்ற பூச்சிக்கொல்லி மருந்துகள் அனுமதிக்கப்பட்ட அளவை விட அதிகமாக இருப்பது பொதுமக்களிடையே அதிர்ச்சியை ஏற்படுத்தியுள்ளது.

இந்த நச்சு ரசாயனங்கள் கல்லீரல், மூளை மற்றும் இனப்பெருக்க மண்டலத்தை கடுமையாக பாதிக்கக்கூடியவை என ஆய்வுகள் எச்சரிக்கின்றன. எலிகள் மீது நடத்தப்பட்ட சோதனையில் இவை புற்றுநோயை உண்டாக்கும் காரணியாக இருப்பது உறுதியானது. இதனையடுத்து, இந்திய உணவு பாதுகாப்பு மற்றும் தர நிர்ணய சட்டத்தின் கீழ் சம்பந்தப்பட்ட நிறுவனங்கள் மீது கடும் நடவடிக்கை எடுக்க அதிகாரிகள் உத்தரவிட்டுள்ளனர். உங்கள் ஆரோக்கியத்தைக் காக்க மசாலாப் பொருட்களைத் தேர்ந்தெடுப்பதில் கூடுதல் கவனம் செலுத்துவது அவசியமாகிறது.