டெல்லி மற்றும் அதன் சுற்றுவட்டாரப் பகுதிகளில் நிலவும் கடுமையான காற்று மாசுபாடு மக்களின் நுரையீரலைப் பெருமளவில் சிதைத்து வருகிறது. மூத்த ரேடியாலஜிஸ்ட் டாக்டர் சந்தீப் ஷர்மா கூறுகையில், கரோனா காலத்தில் நுரையீரலில் ஏற்பட்ட தழும்புகளைப் போலவே தற்போதைய மாசுபாடும் நுரையீரலில் ஆழமான பாதிப்புகளை ஏற்படுத்துவதாக எச்சரித்துள்ளார். காற்றில் உள்ள பி.எம் 2.5 நுண்துகள்கள் நேரடியாக இரத்தத்தில் கலந்து சுவாச நோய்களையும் புற்றுநோய் அபாயத்தையும் அதிகரிக்கிறது.

நிபுணர்களின் கூற்றுப்படி, 300 ஏ.க்யூ.ஐ அளவிலான காற்றில் சுவாசிப்பது ஒரு நாளைக்கு 20 சிகரெட்டுகளைப் பிடிப்பதற்குச் சமமாகும். இதனால் புகைப்பிடிக்காதவர்களுக்கும் நுரையீரல் புற்றுநோய் ஏற்படும் அபாயம் அதிகரித்துள்ளது. வரும் 2025 ஆம் ஆண்டில் இந்தியாவில் இந்த எண்ணிக்கை 81,200 ஆக உயரக்கூடும் எனக் கணிக்கப்பட்டுள்ளது. மாசுபாட்டால் சி.ஓ.பி.டி மற்றும் ஆஸ்துமா பாதிப்புகள் அதிகரித்து மருத்துவமனையில் அனுமதிக்கப்படுவோரின் எண்ணிக்கை உயர்ந்துள்ளது.