உத்தரபிரதேச மாநிலம் சம்பல் மாவட்டத்தில் உறவுகளையும் அரசு இயந்திரத்தையும் கேள்விக்குள்ளாக்கும் ஒரு அதிர்ச்சிகரமான சம்பவம் நடந்துள்ளது. சுமார் 2 கோடி ரூபாய் மதிப்புள்ள 12 பிகா நிலத்தை அபகரிப்பதற்காக, ஒரு பெண் தனது காதலனுடன் சேர்ந்து உயிருடன் இருக்கும் தனது கணவனுக்கு போலி இறப்பு சான்றிதழ் தயாரித்துள்ளார். அந்த நபர் தனது ஓட்டுநர் உரிமம் அல்லது வாக்காளர் அடையாள அட்டை தொடர்பான வேலைக்காக சென்றபோதுதான், அரசு ஆவணங்களில் தான் இறந்துவிட்டதாக குறிப்பிடப்பட்டிருப்பதை அறிந்து அதிர்ச்சியடைந்தார்.

தற்போது அந்த நபர் “ஐயா நான் உயிரோடுதான் இருக்கிறேன்” என்ற வாசகம் எழுதிய பலகையை கழுத்தில் தொங்கவிட்டுக்கொண்டு நீதிக்காக காவல் நிலையத்திற்கு வந்துள்ளார். தனது மனைவியும் அவரது காதலனும் தன்னை கொலை செய்ய சதி செய்வதாக அவர் குற்றம் சாட்டியுள்ளார். இந்த சம்பவம் சமூக வலைதளங்களில் வைரலாகி வரும் நிலையில், போலி சான்றிதழ் வழங்கிய அரசு அதிகாரிகள் மீது கடும் நடவடிக்கை எடுக்க வேண்டும் என பொதுமக்கள் கோரிக்கை விடுத்து வருகின்றனர்.