இடது கையில் ஏற்படும் அனைத்து வலிகளும் மாரடைப்பு அல்ல என்றாலும், இது இதய நோயின் மிக முக்கியமான அறிகுறிகளில் ஒன்றாகும். இதயத் தமனிகளில் இரத்த ஓட்டம் தடைபடும் போது, அந்த வலி நெஞ்சின் நடுப்பகுதியில் தொடங்கி இடது தோள்பட்டை மற்றும் கை வழியாகப் பரவுகிறது. இதனை மருத்துவர்கள் ‘ரெஃபர்ட் பெயின்’ என்று அழைக்கிறார்கள். எனவே, இடது கை வலியுடன் நெஞ்சு பகுதியில் அழுத்தம் அல்லது எரிச்சல் உணர்வு ஏற்பட்டால், அதைச் சாதாரண தசைப் பிடிப்பு என்று கருதி அலட்சியப்படுத்தக் கூடாது.

வலியுடன் அதிகப்படியான வியர்வை, மூச்சுத் திணறல், தாடை அல்லது முதுகு வலி மற்றும் தலைசுற்றல் போன்ற அறிகுறிகள் இருந்தால், அது மாரடைப்பிற்கான எச்சரிக்கையாக இருக்கலாம். கையை அசைக்கும்போது வலி குறையாமல் இருப்பது அல்லது ஓய்வெடுக்கும் போதும் அசௌகரியம் நீடிப்பது ஆபத்தான நிலையைக் குறிக்கிறது. இதுபோன்ற சூழலில் வீட்டு வைத்தியத்தை நாடாமல், உடனடியாக மருத்துவரை அணுகி இசிஜி (ECG) பரிசோதனை செய்து கொள்வது உயிர் காக்க உதவும்.