நாடு முழுவதும் சமையல் எரிவாயு தட்டுப்பாடு குறித்த கவலைகள் எழுந்துள்ள நிலையில், சிலிண்டரில் மீதமுள்ள கேஸ் அளவை எளிதாகக் கண்டறியும் ஒரு வீடியோ சமூக வலைதளங்களில் வேகமாகப் பரவி வருகிறது. எந்த ஒரு கருவியும் இன்றி வீட்டிலேயே சிலிண்டரின் அளவைச் சரிபார்க்க முடியும் என்று அந்த வீடியோவில் கூறப்பட்டுள்ளது. சிலிண்டரை ஒரு ஈரமான துணியால் துடைத்துவிட்டு இரண்டு நிமிடங்கள் காத்திருந்தால், கேஸ் இருக்கும் பகுதி ஈரமாகவே இருக்கும் என்றும், காலியாக உள்ள பகுதி விரைவில் காய்ந்துவிடும் என்றும் அந்தப் பதிவில் விளக்கப்பட்டுள்ளது.

சுமார் இரண்டு கோடிக்கும் அதிகமானோர் பார்த்துள்ள இந்த வீடியோ குறித்து இணையவாசிகள் பலவிதமான கருத்துகளைத் தெரிவித்து வருகின்றனர். சிலர் இந்த முறையைப் பயனுள்ளது என்று கூறினாலும், நிபுணர்கள் இது ஒரு தோராயமான மதிப்பீட்டை மட்டுமே தரும் என்றும், இது நூறு சதவீதம் துல்லியமானது என்பதற்கு எந்த உத்தரவாதமும் இல்லை என்றும் எச்சரிக்கின்றனர். சமையல் பணிகளில் பாதிப்பு ஏற்படாமல் இருக்க, இது போன்ற வைரல் நுணுக்கங்களை மட்டுமே நம்பியிருக்காமல் சரியான நேரத்தில் சிலிண்டர் முன்பதிவு செய்வதே சிறந்தது.