உலகளவில் போர் சூழல் நிலவும்போது தங்கம் விலை உயர்வது வழக்கம் ஆனால் தற்போது நிலைமை தலைகீழாக உள்ளது. ஈரான் மற்றும் இஸ்ரேல் இடையிலான மோதலுக்கு மத்தியிலும் தங்கத்தின் விலை அதிகரிக்காமல் சரிவை நோக்கி நகர்கிறது. கச்சா எண்ணெய் விலை உயர்வு மற்றும் சர்வதேச சந்தையில் அமெரிக்க டாலரின் மதிப்பு வலுவடைந்து வருவது இதற்கு முக்கிய காரணமாகும். டாலர் வலுப்பெறும்போது மற்ற நாட்டு நாணயங்களில் தங்கம் வாங்குவது செலவுமிக்கதாக மாறுவதால் உலகளவில் அதன் தேவை குறைந்துள்ளது.

சென்னையில் மார்ச் 17 நிலவரப்படி 10 கிராம் தங்கம் ரூ.1,59,820-க்கு விற்பனையாகிறது இது சமீபத்திய உச்சத்தை விட குறைவாகும். அமெரிக்க பெடரல் ரிசர்வ் வட்டி விகிதத்தை உயர்த்தக்கூடும் என்ற எதிர்பார்ப்பால் முதலீட்டாளர்கள் தங்கத்தை விடுத்து வங்கி டெபாசிட் மற்றும் பாண்டுகளில் முதலீடு செய்ய ஆர்வம் காட்டுகின்றனர். மேலும் கடந்த சில மாதங்களாக தங்கம் விலை உச்சத்தில் இருந்ததால் பலரும் தற்போது லாபத்தை நோக்கமாகக் கொண்டு தங்கத்தை விற்பனை செய்து வருகின்றனர்.