ஹார்முஸ் நீரிணையில் போர்க்கப்பல்களை நிலைநிறுத்துவது தொடர்பாக அமெரிக்கா தலைமையிலான எந்தவொரு வெளிநாட்டுக் கூட்டணியிலும் சேரப்போவதில்லை என்று இந்தியா திட்டவட்டமாக அறிவித்துள்ளது. இது குறித்து வாஷிங்டனுடன் எந்த இருதரப்பு பேச்சுவார்த்தையும் நடைபெறவில்லை என்று வெளியுறவு அமைச்சக செய்தித் தொடர்பாளர் ரந்தீர் ஜெய்ஸ்வால் உறுதிப்படுத்தியுள்ளார். இந்தியா தனது வணிகக் கப்பல்களின் பாதுகாப்பை உறுதி செய்ய ஈரானுடன் நேரடி தூதரக ரீதியிலான தொடர்புகளை மேற்கொண்டு வருகிறது.

இந்தியப் பிரதமர் மற்றும் வெளியுறவு அமைச்சரின் சமீபத்திய ஈரானியப் பேச்சுவார்த்தையின் பலனாக, இந்தியாவின் இரண்டு எரிவாயு கப்பல்கள் பாதுகாப்பாக அந்தப் பகுதியை கடந்துள்ளன. இது ஒரு கைமாறாக செய்யப்பட்ட விஷயம் அல்ல, மாறாக இரு நாடுகளுக்கும் இடையிலான வரலாற்று ரீதியான நட்புறவின் அடையாளம் என்று இந்தியா கூறுகிறது. போர் மற்றும் மோதல்களைத் தவிர்த்து, இறையாண்மையைப் பாதுகாத்து இராஜதந்திர ரீதியில் அமைதி நிலவ வேண்டும் என்பதே இந்தியாவின் நிலையாகும்.