இமாச்சலப் பிரதேசத்தின் கின்னூர் மாவட்டத்தில் ரௌலேன் திருவிழா உற்சாகமாக நிறைவடைந்தது. மார்ச் 6 முதல் ஐந்து நாட்கள் நடைபெற்ற இந்த பாரம்பரிய விழாவில் உள்ளூர் மக்களுடன் வெளிநாட்டு சுற்றுலாப் பயணிகளும் திரளாகக் கலந்துகொண்டனர். விஷ்ணு மற்றும் பிரம்மா நாராயண் கோவில் வளாகத்தில் மலை தேவதைகளை கௌரவிக்கும் வகையில் இந்த பழமையான திருவிழா கொண்டாடப்பட்டது.

ஆண்கள் பெண் வேடமிட்டு ஆடும் வினோத நடனம் இவ்விழாவின் முக்கிய ஈர்ப்பாகும். கின்னூரி உடைகள் மற்றும் விலங்கு முகமூடிகளை அணிந்து அவர்கள் நடனமாடினர். குறிப்பாக ‘புண்ட்லு’ கதாபாத்திரம் ஆட்டுத்தோல் முகமூடியால் முகத்தை மறைத்து பாரம்பரியத்தை வெளிப்படுத்தியது. உள்ளூர் கலாச்சாரத்தை அடுத்த தலைமுறைக்குக் கொண்டு செல்வதே இந்த வண்ணமயமான நிகழ்வின் நோக்கமாகும்.