ஈரானில் நிலவும் போர் பதற்றம் காரணமாக அங்குள்ள இந்திய குடிமக்களுக்கு இந்திய தூதரகம் உயர்மட்ட எச்சரிக்கை விடுத்துள்ளது. மாணவர்கள், சுற்றுலாப் பயணிகள் மற்றும் வணிகர்கள் அனைவரும் உடனடியாகக் கிடைக்கும் விமான சேவைகள் மூலம் தாயகம் திரும்புமாறு அறிவுறுத்தப்பட்டுள்ளனர். மேற்கு ஆசியாவில் பாதுகாப்பு சூழல் வேகமாக மாறி வருவதால், இந்தியர்களின் பாதுகாப்பை கருத்தில் கொண்டு இந்த அவசர கால வெளியேற்ற உத்தரவு பிறப்பிக்கப்பட்டுள்ளது.

மக்கள் கூடும் இடங்கள் மற்றும் போராட்டப் பகுதிகளுக்குச் செல்வதைத் தவிர்க்குமாறு அறிவுறுத்தப்பட்டுள்ள இந்தியர்கள், தங்களின் பாஸ்போர்ட் உள்ளிட்ட ஆவணங்களைக் கைவசம் வைத்திருக்குமாறு கேட்டுக்கொள்ளப்பட்டுள்ளனர். அவசர கால உதவிக்கு தூதரகத்தின் உதவி எண்களைத் தொடர்பு கொள்ளலாம். ஈரானில் உள்ள அனைத்து இந்தியர்களும் தங்கள் விவரங்களை உடனடியாகத் தூதரகத்தில் பதிவு செய்யுமாறு மத்திய அரசு வலியுறுத்தியுள்ளது, இது மீட்பு நடவடிக்கைகளை எளிதாக்க உதவும்.