சமூக நீதி மற்றும் சாதிய கட்டமைப்பு குறித்த தனது கருத்துக்களை வலுவாக தற்காத்துப் பேசிய கர்நாடக முதல்வர் சித்தராமையா, பாஜக மற்றும் ஜேடிஎஸ் கட்சிகளை கடுமையாக விமர்சித்துள்ளார். காங்கிரஸ் கட்சி மட்டுமே தன்னை போன்ற பிற்படுத்தப்பட்ட வகுப்புத் தலைவர்களை உயரிய பதவிகளுக்கு கொண்டு வந்துள்ளது என்று அவர் கூறினார். எதிர்காலத்தில் ஒரு தலித் முதல்வர் உருவானால் அது காங்கிரஸால் மட்டுமே நிகழும் என அவர் உறுதிபட தெரிவித்தார்.

மத்திய அமைச்சர் குமாரசாமி மற்றும் தேவகௌடா ஆகியோர் சாதியை அரசியலுக்கு பயன்படுத்துவதாக குற்றம் சாட்டிய அவர், அவர்கள் குடும்ப அரசியலில் மட்டுமே ஆர்வம் காட்டுவதாக சாடினார். கடந்த 40 ஆண்டுகளாக சமூக நீதிக்காக தான் குரல் கொடுத்து வருவதாகவும், இது குறித்து எந்தவொரு விவாதத்திற்கும் தான் தயார் என்றும் சித்தராமையா சவால் விடுத்துள்ளார்.