ஆப்கானிஸ்தான் எல்லைக்குள் பாகிஸ்தான் நடத்திய வான்வழித் தாக்குதலை இந்தியா வன்மையாகக் கண்டித்துள்ளது. தனது உள்நாட்டுத் தோல்விகளை மறைக்கவே பாகிஸ்தான் இத்தகைய செயலில் ஈடுபடுவதாக இந்திய வெளியுறவு அமைச்சக செய்தித் தொடர்பாளர் ரந்தீர் ஜெய்ஸ்வால் தெரிவித்துள்ளார். புனிதமான ரமலான் மாதத்தில் அப்பாவி மக்கள் மற்றும் குழந்தைகள் மீது நடத்தப்பட்ட இந்தத் தாக்குதல் அநீதியானது என்று இந்தியா சாடியுள்ளது. ஆப்கானிஸ்தானின் இறையாண்மைக்கு இந்தியா தனது ஆதரவை மீண்டும் உறுதிப்படுத்தியுள்ளது.

இந்தத் தாக்குதலில் பெண்கள் உட்பட 18 பொதுமக்கள் கொல்லப்பட்டதாக ஆப்கான் தரப்பு கூறுகிறது. ஆனால் 70 பயங்கரவாதிகளை கொன்றதாக பாகிஸ்தான் கூறுவதை காபூல் மறுத்துள்ளது. இந்தச் சம்பவத்தால் இரு நாடுகளுக்கும் இடையே போர் பதற்றம் அதிகரித்துள்ளது. தகுந்த நேரத்தில் இதற்குப் பதிலடி கொடுக்கப்படும் என்று ஆப்கானிஸ்தான் எச்சரித்துள்ளது. இது பிராந்திய அமைதிக்கு பெரும் சவாலாக மாறியுள்ளதால் சர்வதேச சமூகம் உற்று நோக்கி வருகிறது.