அறுவை சிகிச்சை அறையில் மருத்துவர்கள் ஏன் எப்போதும் நீலம் அல்லது பச்சை நிற ஆடைகளை மட்டுமே அணிகிறார்கள் என்று நீங்கள் எப்போதாவது யோசித்ததுண்டா? இது வெறும் ஃபேஷன் அல்லது மருத்துவமனையின் விதிமுறை மட்டுமல்ல, இதற்குப் பின்னால் ஒரு முக்கியமான அறிவியல் காரணமும், நோயாளியின் உயிர் பாதுகாப்பு குறித்த ரகசியமும் ஒளிந்துள்ளது.

ஏன் வெள்ளை நிறம் தவிர்க்கப்படுகிறது?

ஆரம்ப காலங்களில் மருத்துவர்கள் வெள்ளை நிற உடைகளையே அணிந்து வந்தனர். ஆனால், 1914 ஆம் ஆண்டுக்குப் பிறகு இந்த முறையில் மாற்றம் கொண்டு வரப்பட்டது. அறுவை சிகிச்சையின் போது மருத்துவர்கள் நீண்ட நேரம் சிவப்பான ரத்தம் மற்றும் உடலின் உள் உறுப்புகளை உற்றுப் பார்க்க வேண்டியிருக்கும். அந்த நிலையில், திடீரென்று வெள்ளை நிறத்தைப் பார்க்கும்போது அவர்களின் கண்களில் ஒருவித ‘பார்வை சிதறல்’ அல்லது தற்காலிக கண் கூச்சம் (Visual Illusion) ஏற்படும். இது கேமராவின் ஃபிளாஷ் லைட் நம் கண்களில் பட்டால் ஏற்படும் விளைவைப் போன்றது.

பச்சை மற்றும் நீல நிறத்தின் அறிவியல்

அறிவியல் ரீதியாக, சிவப்பு நிறத்திற்கு நேர் எதிரான அல்லது நிரப்பு நிறங்களாக பச்சை மற்றும் நீலம் கருதப்படுகின்றன. சிவப்பு நிறத்தையே தொடர்ந்து பார்ப்பதால் ஏற்படும் கண்களின் சோர்வை இந்த நிறங்கள் நீக்குகின்றன.

• கவனத்தை மேம்படுத்துதல்: இந்த நிறங்கள் மருத்துவர்களின் பார்வையைத் தெளிவாக வைத்திருக்க உதவுகின்றன. இது அறுவை சிகிச்சையின் போது மிகச்சிறிய நுணுக்கங்களையும் துல்லியமாகக் கவனிக்க வழிவகுக்கிறது.
• தலைவலியைத் தடுத்தல்: ஆபரேஷன் தியேட்டரில் உள்ள பிரகாசமான விளக்குகளின் பிரதிபலிப்பு வெள்ளை உடையில் பட்டால், அது மருத்துவர்களுக்குத் தலைவலி அல்லது பார்வைக் குறைபாட்டை ஏற்படுத்தக்கூடும். நீலம் மற்றும் பச்சை நிறங்கள் இந்த ஒளியை உள்வாங்கிக் கொண்டு கண்களுக்குக் குளிர்ச்சியைத் தருகின்றன.
• துல்லியமான சிகிச்சை: ஒரு சிறு தவறு கூட நோயாளியின் உயிருக்கு ஆபத்தாக முடியலாம் என்பதால், மருத்துவர்களின் மன அழுத்தத்தைக் குறைத்து, அவர்களின் முழு கவனத்தையும் அறுவை சிகிச்சையில் நிலைநிறுத்த இந்த நிறங்கள் பெரும் பங்காற்றுகின்றன.

சுருக்கமாகச் சொன்னால், மனித உயிர்களைக் காக்கும் அந்தப் போராட்டக்களத்தில், மருத்துவர்களின் கண்களுக்குப் பாதுகாப்பு அளித்து, அறுவை சிகிச்சையை எவ்விதத் தடையுமின்ன்றி வெற்றிகரமாக முடிக்கவே இந்த அமைதியான நிறங்கள் தேர்வு செய்யப்பட்டுள்ளன.