இந்திய வான்படையின் பலத்தை உலகத்தரம் வாய்ந்த நிலைக்கு உயர்த்தும் நோக்கில், மேலும் 114 ரஃபேல் (Rafale) போர் விமானங்களை வாங்குவதற்குப் பிரதமர் நரேந்திர மோடி தலைமையிலான மத்திய அரசு அதிரடி ஒப்புதல் அளித்துள்ளது.

மத்திய பாதுகாப்புத்துறை அமைச்சர் ராஜ்நாத் சிங் தலைமையிலான பாதுகாப்பு கையகப்படுத்தல் கவுன்சில் (DAC), இதற்கான அதிகாரப்பூர்வ அனுமதியை வழங்கியுள்ளது. சுமார் 3.25 லட்சம் கோடி ரூபாய் மதிப்பீட்டில் இந்த பிரம்மாண்ட பாதுகாப்பு ஒப்பந்தம் மேற்கொள்ளப்பட உள்ளது. பிரெஞ்சு அதிபர் இம்மானுவேல் மேக்ரான் இந்தியா வருகை தரவுள்ள நிலையில், இந்த முக்கிய அறிவிப்பு வெளியாகியுள்ளது பாதுகாப்பு வட்டாரங்களில் உன்னிப்பாகக் கவனிக்கப்படுகிறது.

ஏன் இந்த கூடுதல் கொள்முதல்?

• பாகிஸ்தானுக்கு எச்சரிக்கை: ‘ஆபரேஷன் சிந்துர்’ போன்ற முக்கிய ராணுவ நடவடிக்கைகளில் ரஃபேல் விமானங்கள் ஆற்றிய பங்கு அளப்பரியது. தற்போது 114 புதிய விமானங்களை இணைப்பதன் மூலம், எல்லை தாண்டிய அச்சுறுத்தல்களுக்கு இந்தியா மிகக் கடுமையான பதிலடி கொடுக்கும் என்பதில் மாற்றுக் கருத்தில்லை.
• வான்வெளி ஆதிக்கம்: நவீன ரேடார் வசதிகள், நீண்ட தூர ஏவுகணைத் திறன் மற்றும் எதிரி நாட்டு ரேடார்களில் சிக்காத தொழில்நுட்பம் ஆகியவற்றால் ரஃபேல் தனித்துவம் வாய்ந்தது.
• சீன எல்லைப் பாதுகாப்பு: கிழக்கு லடாக் மற்றும் அருணாச்சலப் பிரதேச எல்லைகளில் நிலவும் பதற்றத்தைக் கையாளவும், இந்திய வான்படையின் ‘ஸ்குவாட்ரன்’ (Squadron) எண்ணிக்கையை அதிகரிக்கவும் இந்த முடிவு எடுக்கப்பட்டுள்ளது.

இந்த 114 போர் விமானங்களில் பெரும்பாலானவை ‘மேக் இன் இந்தியா’ திட்டத்தின் கீழ் உள்நாட்டிலேயே தயாரிக்கப்பட வாய்ப்புள்ளதாகவும் தகவல்கள் தெரிவிக்கின்றன. இதன் மூலம் அண்டை நாடுகளான பாகிஸ்தான் மற்றும் சீனாவிற்கு இந்தியா தனது வலிமையான ராணுவ நிலைப்பாட்டை உரக்கச் சொல்லியுள்ளது.

இந்த ஒப்பந்தம் இந்திய வான்படையின் வரலாற்றில் ஒரு மைல்கல்லாகப் பார்க்கப்படுகிறது.