ஆர்டிபிஷியல் இன்டெலிஜென்ஸ் (AI) தொழில்நுட்பத்தின் தவறான பயன்பாட்டைத் தடுக்க, டிஜிட்டல் தளங்களுக்கான புதிய மற்றும் கடுமையான விதிகளை மத்திய அரசு அறிவித்துள்ளது. திருத்தப்பட்ட புதிய தகவல் தொழில்நுட்ப விதிகளின்படி, சமூக ஊடகங்களில் பகிரப்படும் AI மூலம் உருவாக்கப்பட்ட உள்ளடக்கங்களுக்கு (Content) ‘AI-generated’ என்ற லேபிளை ஒட்டுவது இனி கட்டாயமாக்கப்பட்டுள்ளது.

முக்கியமாக, ஆபாசமான அல்லது சட்டவிரோதமான பதிவுகளை நீக்குவதற்கு வழங்கப்பட்ட 36 மணிநேர கால அவகாசம், தற்போது வெறும் 3 மணிநேரமாக குறைக்கப்பட்டுள்ளது. பிப்ரவரி 10-ஆம் தேதி வெளியிடப்பட்ட இந்த புதிய விதிகள், வரும் பிப்ரவரி 20 முதல் நடைமுறைக்கு வருகின்றன.

புதிய விதிகளின் சிறப்பம்சங்கள்:

• மெட்டாடேட்டா கட்டாயம்: AI மூலம் உருவாக்கப்பட்ட ஆடியோ அல்லது வீடியோவின் மூலத்தைக் கண்டறிய நிரந்தர மெட்டாடேட்டாவைப் பயன்படுத்த வேண்டும்.
• பயனர் பொறுப்பு: உள்ளடக்கத்தைப் பதிவேற்றும் போது அதன் உண்மைத்தன்மை குறித்து பயனர் உறுதிப்படுத்த வேண்டும்.
• கடும் நடவடிக்கை: இந்த விதிகளைப் பின்பற்றத் தவறினால், சம்பந்தப்பட்ட சமூக ஊடக நிறுவனங்கள் கடுமையான சட்ட நடவடிக்கைகளைச் சந்திக்க நேரிடும்.