உடல் எடையைக் குறைக்க விரும்புபவர்கள் முதலில் தேர்ந்தெடுக்கும் பயிற்சிகள் ஓட்டம் (Running) மற்றும் சைக்கிள் ஓட்டுதல் (Cycling) ஆகும். இவை இரண்டுமே கலோரிகளை எரிப்பதில் சிறந்தது என்றாலும், எது அதிக பலன் தரும் என்பதில் பலருக்கும் குழப்பம் உண்டு.

சமீபத்திய சுகாதார ஆய்வுகளின்படி, விரைவாக கொழுப்பைக் குறைக்க ஓடுவது ஒரு படி மேலே இருந்தாலும், நீண்ட கால அடிப்படையில் சைக்கிள் ஓட்டுவதும் சமமான பலனைத் தரக்கூடியது.

கலோரிகளை எரிப்பதில் உள்ள வேறுபாடு

நிபுணர்களின் கூற்றுப்படி, 70 கிலோ எடையுள்ள ஒரு நபர் வேகமாக ஓடும்போது ஒரு மணி நேரத்திற்கு சுமார் 566 முதல் 839 கலோரிகள் வரை எரிக்க முடியும். அதே சமயம், அதே எடையுள்ள நபர் வேகமாக சைக்கிள் ஓட்டும்போது ஒரு மணி நேரத்திற்கு சுமார் 498 முதல் 738 கலோரிகள் வரை மட்டுமே எரிக்கப்படுகிறது. அதாவது, நேரத்தின் அடிப்படையில் ஓடுவது அதிக கலோரிகளை எரிக்கிறது.

ஓடுவதன் நன்மைகள் மற்றும் சவால்கள்

ஓடுவதால் உடலின் வளர்சிதை மாற்றம் (Metabolism) அதிகரிக்கிறது. இது ஒரு ‘வெயிட்-பியரிங்’ பயிற்சி என்பதால் கால் மற்றும் உடலின் மேல் பகுதி தசைகள் இணைந்து செயல்படுகின்றன. குறைந்த நேரத்தில் அதிக பலன் பெற ஓடுவது சிறந்தது. இருப்பினும், ஓடும்போது முழங்கால் மற்றும் கணுக்கால் மூட்டுகளில் அதிக அழுத்தம் ஏற்படும். எனவே, மூட்டு வலி இருப்பவர்களுக்கு இது சவாலாக இருக்கலாம்.

சைக்கிள் ஓட்டுதலின் பிளஸ் பாயிண்ட்ஸ்

சைக்கிள் ஓட்டுவதில் மூட்டுகளுக்கு அழுத்தம் மிகவும் குறைவு. இதனால் நீண்ட நேரம் தொடர்ந்து பயிற்சி செய்ய முடியும். மலைப்பாதைகளில் அல்லது அதிக வேகத்தில் சைக்கிள் ஓட்டும்போது கால்களின் தசை வலிமை கூடும். குறிப்பாக, காயங்கள் ஏற்படும் அபாயம் குறைவாக இருப்பதால் இது பாதுகாப்பான ஒன்றாகக் கருதப்படுகிறது.

எது சிறந்தது?

விரைவான முடிவுகளை விரும்புபவர்களுக்கு ஓடுவது சிறந்த தேர்வாகும். ஆனால் நீண்ட காலத்திற்கு வலியின்றி பயிற்சியைத் தொடர விரும்புபவர்கள் சைக்கிள் ஓட்டுதலைத் தேர்ந்தெடுக்கலாம். நிபுணர்களின் கருத்துப்படி, இந்த இரண்டையும் கலந்து செய்வதுடன், சரியான உணவு முறையைப் பின்பற்றி தினசரி 300-500 கலோரிகளைக் குறைப்பதே உடல் எடையைக் குறைக்கச் சரியான வழியாகும்.