மக்களின் அன்றாடத் தேவைகளைப் பூர்த்தி செய்யாத மத்திய பட்ஜெட்டைக் கண்டித்து, நாடாளுமன்றத்தில் திரிணாமுல் காங்கிரஸ் எம்.பி அபிஷேக் பானர்ஜி ஆவேசமாக உரையாற்றினார். பிரபல கவிஞர் நபாருண் பட்டாச்சார்யாவின் கவிதை வரிகளை மேற்கோள் காட்டிய அவர், “நமது நாடு உண்மையில் ஒரு ‘மரணப் பள்ளத்தாக்காக’ மாறி வருகிறதா?” என்று கேள்வி எழுப்பினார்.

மத்திய அரசின் வரிச் சுமையால் சாமானிய மக்கள் நசுக்கப்படுவதாகக் குற்றம் சாட்டிய அபிஷேக், இந்த பட்ஜெட்டைப் பணக்காரர்களுக்கு ஆதரவான ‘ரிவர்ஸ் ராபின் ஹுட்’ (Reverse Robin Hood) திட்டம் என்று விமர்சித்தார். “சாமானியர்களின் பாக்கெட்டுகளைப் பறித்து பெருநிறுவனங்களுக்குக் கொடுப்பதே இந்த அரசின் நோக்கம்” என்று அவர் சாடினார்.

மேற்கு வங்கத்திற்கு வழங்க வேண்டிய ரூ. 1.90 லட்சம் கோடி நிலுவைத் தொகையை வழங்காமல் மத்திய அரசு வஞ்சிப்பதாகக் குறிப்பிட்ட அவர், பிராந்திய பாகுபாடு மக்களின் வாழ்வாதாரத்தைப் பாதிப்பதாகத் தெரிவித்தார். “மீன் சாப்பிடுவதோ அல்லது வங்காள மொழியில் பேசுவதோ குற்றமென்றால், அந்த உரிமைகளுக்காகத் தொடர்ந்து போராடுவோம்” என்று டெல்லி தர்பாரில் அவர் எச்சரிக்கை விடுத்தார்.

இந்த பட்ஜெட் விலைவாசி உயர்வை மட்டுமே பரிசாகத் தந்துள்ளதாகக் கூறி, மக்களின் அடிப்படை உரிமைகளில் ஒருபோதும் சமரசம் செய்துகொள்ளப் போவதில்லை என்று அவர் உறுதிபடத் தெரிவித்தார்.