செய்தி பிரிவு : ஒரு ஊழியர் தனது முதல் மாத சம்பளம் வந்த ஐந்தே நிமிடத்தில் வேலையை ராஜினாமா செய்த சம்பவம் சமூக வலைதளங்களில் பெரும் விவாதத்தை கிளப்பியுள்ளது. ஒரு எச்ஆர் (HR) அதிகாரி பகிர்ந்த இந்த தகவல், இன்றைய கால இளைஞர்களின் வேலை குறித்த அணுகுமுறை மற்றும் தொழில்முறை ஒழுக்கம் பற்றி பல கேள்விகளை எழுப்பியுள்ளது. ஒரு நிறுவனம் ஒரு ஊழியருக்கு பயிற்சி அளித்து தயார் செய்த பிறகு, அவர் இப்படி சட்டென விலகுவது அந்த நிறுவனத்தையும் மற்ற ஊழியர்களையும் எவ்வாறு பாதிக்கும் என்பதே இங்கு முக்கிய கேள்வியாக உள்ளது.

இந்த சம்பவத்திற்கு ஆதரவாகவும் எதிராகவும் பல கருத்துக்கள் பதிவிடப்பட்டு வருகின்றன. நிறுவனம் அந்த ஊழியருக்கு பயிற்சி அளிக்க பல வாரங்கள் செலவிட்ட நிலையில், இது முறையற்ற செயல் என சிலர் கூறுகின்றனர். ஆனால், ஊழியர்களோ சம்பளம் என்பது செய்த வேலைக்கான ஊதியம் தான், அதை வாங்கிய பின் விலகுவதில் தவறில்லை என வாதிடுகின்றனர். நிறுவனங்கள் ஊழியர்களை முன்னறிவிப்பின்றி நீக்கும் போது இல்லாத அறநெறி, ஊழியர் விலகும் போது மட்டும் ஏன் என பலரும் கேள்வி எழுப்புகின்றனர்.