பார்வை செய்தி பிரிவு : அமெரிக்க சந்தையில் இந்திய பொருட்களின் ஆதிக்கம் இனி அதிகரிக்கப் போகிறதா? பிரதமர் மோடி மற்றும் அதிபர் டிரம்ப் இடையிலான வரலாற்றுச் சிறப்புமிக்க பேச்சுவார்த்தைக்குப் பிறகு, இந்திய பொருட்களுக்கான இறக்குமதி வரி 50 சதவீதத்திலிருந்து 18 சதவீதமாக குறைக்கப்பட்டுள்ளது. சீனாவின் பொருட்களுக்கு 34 சதவீத வரி விதிக்கப்பட்டுள்ள நிலையில், இந்தியாவிற்கு கிடைத்துள்ள இந்த சலுகை நாட்டின் ஏற்றுமதி வணிகத்தை அடுத்த நிலைக்கு கொண்டு செல்லும். இதனால் உள்நாட்டில் உற்பத்தி பெருகி, வேலைவாய்ப்புகள் அதிகரிக்க நேரடி வாய்ப்பு உருவாகியுள்ளது.

இந்த வரி குறைப்பு ஒப்பந்தத்தின் பின்னணியில் ஒரு முக்கிய நிபந்தனை உள்ளது. ரஷ்யாவிடம் இருந்து எண்ணெய் வாங்குவதை குறைத்து, அமெரிக்கா மற்றும் வெனிசுலாவிலிருந்து இறக்குமதி செய்ய இந்தியா ஒப்புக்கொண்டுள்ளது. வங்கதேசம் (20%), பாகிஸ்தான் (19%) போன்ற அண்டை நாடுகளை விட குறைவான வரி விகிதம் இந்தியாவிற்கு கிடைத்துள்ளது ஒரு மிகப்பெரிய ராஜதந்திர வெற்றியாக பார்க்கப்படுகிறது. இதன் மூலம் இந்திய தயாரிப்புகள் உலக சந்தையில் குறைந்த விலையில் கிடைக்கும், இது நாட்டின் பொருளாதார வளர்ச்சியை மேலும் துரிதப்படுத்தும்.