முதலீட்டாளர்களின் பாதுகாப்பை உறுதி செய்யும் வகையில் செபி அமைப்பு ‘மியூச்சுவல் ஃபண்ட் ஒழுங்குமுறை 2026’ என்ற புதிய சட்டதிட்டங்களை அறிவித்துள்ளது. தற்போதுள்ள நடைமுறைகளை ஒரு முறையான சட்டக் கட்டமைப்பிற்குள் கொண்டு வருவதே இதன் முக்கிய நோக்கமாகும். இதன் மூலம் சாதாரண முதலீட்டாளர்கள் சிக்கலான சுற்றறிக்கைகளுக்குப் பதிலாக, முதலீட்டு விதிகள் மற்றும் பாதுகாப்பு அம்சங்களை எளிய மொழியில் நேரடியாகப் புரிந்துகொள்ள வழிவகை செய்யப்பட்டுள்ளது.

இந்த மாற்றத்தின் மூலம் முதலீட்டுச் செலவுகள் கணிசமாகக் குறைய வாய்ப்புள்ளது. இனி ‘அடிப்படை செலவு விகிதம்’ வாயிலாக அரசு வரிகள் மற்றும் நிர்வாகக் கட்டணங்கள் தனித்தனியாகக் காட்டப்படும். மேலும் தரகுக் கட்டணங்களுக்கான உச்சவரம்பு குறைக்கப்பட்டுள்ளதோடு, டிமேட் பங்குகளை விரைவாக மாற்றும் வசதியும் அறிமுகப்படுத்தப்பட்டுள்ளது. இந்த சீர்திருத்தங்கள் முதலீட்டாளர்களின் தேவையற்ற செலவுகளைக் குறைத்து நீண்ட கால அடிப்படையில் அதிக லாபம் ஈட்ட உதவும்.