தலைநகர் டெல்லியில் நிர்வாக வசதிக்காகவும், சிறந்த ஆளுமைக்காகவும் மாவட்டங்களின் எண்ணிக்கை 11ல் இருந்து 13 ஆக உயர்த்தப்பட்டுள்ளது. இது தொடர்பாக தலைமைச் செயலாளர் ராஜீவ் வர்மா புதன்கிழமை அதிகாரப்பூர்வ அறிவிப்பை வெளியிட்டார். முதல்வர் ரேகா குப்தா சில நாட்களுக்கு முன் இந்த திட்டத்திற்கு ஒப்புதல் அளித்தார். டெல்லி மாநகராட்சி (MCD) எல்லையுடன் பொருந்தும் வகையில் புதிய மாவட்டங்கள் உருவாக்கப்பட்டுள்ளன, இது உள்ளாட்சி மற்றும் மாவட்ட நிர்வாகத்திற்கு இடையே சிறந்த ஒருங்கிணைப்பை உறுதி செய்யும்.

முதல்வர் ரேகா குப்தா, இந்த மாற்றத்தின் மூலம் ஆட்சி முறை மேலும் சீராகும் என்றும், வருவாய் மாவட்டங்கள் மற்றும் மாநகராட்சியின் எல்லைகள் ஒரே மாதிரியாக இருக்கும் என்றும் தெரிவித்துள்ளார். பழைய 11 மாவட்டங்களில் இருந்து ஷாதரா நீக்கப்பட்டு, புதியதாக ஓல்ட் டெல்லி, சென்ட்ரல் நார்த் மற்றும் அவுட்டர் டெல்லி ஆகிய மூன்று மாவட்டங்கள் சேர்க்கப்பட்டுள்ளன.