இந்தியா மற்றும் தென்னாப்பிரிக்கா இடையேயான ஒருநாள் தொடரின் போது, ​​மகேந்திர சிங் தோனி (MS Dhoni) தனது சொந்த மண்ணான ராஞ்சியில் இந்திய அணியின் போட்டியை பார்க்க வராதது கிரிக்கெட் வட்டாரங்களில் பல்வேறு ஊகங்களை ஏற்படுத்தியது. வழக்கமாக, ராஞ்சியில் இந்தியாவின் போட்டி நடக்கும் போது தோனி மைதானத்தில் இருப்பார். ஆனால், நவம்பர் 30 அன்று நடந்த முதல் ஒருநாள் போட்டியில் அவர் கலந்து கொள்ளாதது கேள்விகளை எழுப்பியது. இறுதியில், ஜார்கண்ட் மாநில கிரிக்கெட் சங்கத்தின் (JSCA) செயலாளர் சௌரப் திவாரி (Saurabh Tiwary) உண்மையான காரணத்தை வெளியிட்டுள்ளார்.

தோனி அவரது பிஸியான கால அட்டவணை காரணமாக ராஞ்சியில் இல்லை என்று JSCA செயலாளர் சௌரப் திவாரி உறுதிப்படுத்தினார். சௌரப் திவாரி கூறுகையில், “சில நாட்களுக்கு முன்பு தோனி பையாவுடன் பேசினேன். நான் அன்று ராஞ்சியில் இருக்க மாட்டேன், அதனால் போட்டி பார்க்க வர முடியாது என்று அவர் முன்பே என்னிடம் கூறியிருந்தார்.” மேலும், விராட் கோலி மற்றும் ரோஹித் சர்மா விளையாடும் விதத்தைப் பார்த்தால், அவர்கள் இருவரும் 2027 ஒருநாள் உலகக் கோப்பையில் எளிதாக விளையாட முடியும் என்றும் திவாரி கருத்து தெரிவித்தார்.