உத்தரபிரதேச மாநிலம் மொராதாபாத்தில் உள்ள மைனாதெர் காவல் நிலைய எல்லைக்குட்பட்ட பகுதியில் பயங்கர சம்பவம் நடந்துள்ளது. கடந்த ஞாயிற்றுக்கிழமை மாலை புல் அறுக்க வயலுக்குச் சென்ற சிறுமி திடீரென காணாமல் போனார். இரவு முழுவதும் தேடியும் சிறுமி கிடைக்காத நிலையில், மறுநாள் காலையில் மக்காச்சோள வயலில் அவரது நிர்வாண மற்றும் சிதைந்த உடல் மீட்கப்பட்டது. உடலின் பிறப்புறுப்பு உட்பட 40-க்கும் மேற்பட்ட ஆழமான காயங்கள் இருந்ததால், கொடூரமான கொலைக்கு முன் பாலியல் வன்கொடுமை நடந்திருக்கலாம் என அஞ்சப்படுகிறது.

மொராதாபாத் எஸ்.எஸ்.பி சத்யபால் அன்டில் சம்பவ இடத்தைப் பார்வையிட்டார். அவர் கூறுகையில், பாதிக்கப்பட்ட குடும்பத்தினர் சில தெரிந்தவர்களின் பெயர்களைக் குறிப்பிட்டுள்ளதால், குடும்பப் பகை அல்லது உள்ளூர் தகராறு உள்ளிட்ட அனைத்து கோணங்களிலும் விசாரணை நடைபெற்று வருகிறது. தடயவியல் குழு ஆதாரங்களைச் சேகரித்து வருகிறது. பாலியல் வன்கொடுமை குறித்து உறுதிப்படுத்த பிரேதப் பரிசோதனை அறிக்கைக்காக காத்திருப்பதாகவும், குற்றவாளிகள் விரைவில் கைது செய்யப்படுவார்கள் என்றும் போலீசார் உறுதியளித்துள்ளனர்.