கொல்கத்தா ஈடன் கார்டன்ஸில் நடைபெற்று வரும் இந்தியா – தென்னாப்பிரிக்கா டெஸ்ட் போட்டி விரைவில் முடிவுக்கு வரும் நிலையில் உள்ளது. ஆடுகளத்திலிருந்து கிடைத்த எதிர்பாராத உதவியின் காரணமாக, இரண்டாவது நாளில் மட்டும் மொத்தம் 16 விக்கெட்டுகள் விழுந்தன. முதல் இன்னிங்ஸில் ஜஸ்பிரித் பும்ரா 5 விக்கெட்டுகளை வீழ்த்திய நிலையில், இரண்டாவது இன்னிங்ஸில் ரவீந்திர ஜடேஜா இதுவரை 4 விக்கெட்டுகளைக் கைப்பற்றியுள்ளார். மறுபுறம், தென்னாப்பிரிக்க சுழற்பந்து வீச்சாளர் சைமன் ஹார்மரும் 4 விக்கெட்டுகளை எடுத்துள்ளார். இந்த டெஸ்டில் இதுவரை எந்த ஒரு பேட்ஸ்மேனும் அரை சதம் அடிக்கவில்லை.

ஆடுகளத்தின் சீரற்ற பவுன்ஸ் மற்றும் திடீர் திருப்பம் காரணமாக இரு அணி பேட்ஸ்மேன்களும் விக்கெட்டுகளைத் தக்கவைத்துக் கொள்வது கடினமாகி உள்ளது. இரண்டாவது நாள் ஆட்ட நேர முடிவில், தென்னாப்பிரிக்கா 7 விக்கெட் இழப்புக்கு 93 ரன்கள் எடுத்து 63 ரன்கள் முன்னிலையில் உள்ளது. இந்நிலையில், 3-ம் நாளில் இந்தியா விரைவாக அவர்களை ஆல் அவுட் செய்து இலக்கைத் துரத்த வேண்டும். ஈடனின் இந்த ‘சாதாரண’ ஆடுகளமே போட்டியின் தலைவிதியை தீர்மானிக்கும் என்று நிபுணர்கள் கருதுகின்றனர்.