White House కు కేవలం రెండు బ్లాకుల దూరంలో జరిగిన కాల్పుల ఘటన వాషింగ్టన్ లో తీవ్ర కలకలం సృష్టించింది. గురువారం తెల్లవారుజామున జరిగిన ఈ దాడిలో వెస్ట్ వర్జీనియా స్టేట్ నేషనల్ గార్డ్ కు చెందిన ఇద్దరు సభ్యులు తీవ్రంగా గాయపడ్డారు. ప్రమాదకర స్థితిలో ఉన్న వారికి ప్రస్తుతం ఆసుపత్రిలో చికిత్స అందిస్తున్నారు. ప్రత్యక్ష సాక్షుల ప్రకారం, ఒక యువకుడు అకస్మాత్తుగా గార్డుల వైపు వచ్చి తుపాకీతో కాల్పులు జరపడం ప్రారంభించాడు. భద్రతా దళాలు త్వరగా సంఘటనా స్థలానికి చేరుకుని, కాల్పులు జరిపిన నిందితుడిని కూడా అరెస్టు చేసి ఆసుపత్రికి తరలించారు. మేయర్ మురియల్ బౌసర్ దీనిని ‘ముందుగా ప్లాన్ చేసిన దాడి’గా పేర్కొన్నారు. ఎఫ్‌బీఐ ఈ దాడి వెనుక ఉన్న ఉద్దేశాన్ని తెలుసుకోవడానికి దర్యాప్తు ప్రారంభించింది.

ఈ సంఘటనపై అమెరికా అధ్యక్షుడు డొనాల్డ్ ట్రంప్ తీవ్రంగా స్పందించారు. “నేషనల్ గార్డ్ సిబ్బందిని కాల్చిన ఆ మృగం భారీ మూల్యం చెల్లించాల్సి వస్తుంది” అని ఆయన ట్రూత్ సోషల్ లో రాశారు. అధ్యక్షుడు ట్రంప్ వెంటనే వాషింగ్టన్ లో అదనంగా 500 మంది నేషనల్ గార్డ్ సభ్యులను మోహరించాలని ఆదేశించారు. అమెరికాలోని సైనిక మరియు శాంతిభద్రతల సిబ్బంది అందరికీ తాను అండగా ఉంటానని తెలిపారు. White House చుట్టూ ఉన్న మొత్తం ప్రాంతంలో భద్రతను పటిష్టం చేశారు. దాడి చేసిన వ్యక్తి ఒంటరిగా చేశాడా లేదా ఏదైనా సంస్థలో భాగమా అనే కోణంలో దర్యాప్తు జరుగుతోంది.