అమెరికా అధ్యక్షుడు డొనాల్డ్ ట్రంప్ కొత్తగా ప్రకటించిన హెచ్-1బి వీసా విధానంతో విదేశీ ఉద్యోగుల్లో ఆందోళన మొదలైంది. కొత్త నిబంధనల ప్రకారం, హెచ్-1బి వీసా కోసం ఒక్కసారిగా రూ.89 లక్షల ఫీజు చెల్లించాలి, ఇది ఆదివారం నుండి అమల్లోకి వచ్చింది. ఈ నేపథ్యంలో, మెటా, మైక్రోసాఫ్ట్, జేపీ మోర్గాన్, అమెజాన్ వంటి ప్రముఖ అమెరికా కంపెనీలు తమ విదేశీ ఉద్యోగులను 24 గంటల్లోగా అమెరికాకు తిరిగి రావాలని ఆదేశించాయి. కొత్త నిబంధనలు అమల్లోకి రాకముందే వారి వీసా స్థితిని సురక్షితం చేసుకోవడానికే ఈ నిర్ణయం తీసుకున్నారు.

ఈ చర్య భారతీయ ఉద్యోగులకు అమెరికాలో ఉద్యోగావకాశాలను తగ్గిస్తుందని నిపుణులు భావిస్తున్నారు. అయితే, ఒక వైట్‌హౌస్ అధికారి మాట్లాడుతూ, ప్రస్తుతం విదేశాలలో ఉన్న హెచ్-1బి వీసా హోల్డర్లు అదనపు ఫీజు చెల్లించాల్సిన లేదా వెంటనే తిరిగి రావాల్సిన అవసరం లేదని స్పష్టం చేశారు. ఈలోగా, ట్రంప్ నిర్ణయాన్ని వ్యతిరేకిస్తూ అమెరికన్ కాంగ్రెస్ సభ్యుడు రాజా కృష్ణమూర్తి మాట్లాడుతూ, ట్రంప్ నైపుణ్యం కలిగిన ఉద్యోగులను అమెరికా నుండి దూరం చేయడానికి ప్రయత్నిస్తున్నారని విమర్శించారు.